Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Kryetari i Partisë Demokratike, Sali Berisha, ka vijuar sulmet personale ndaj ish-drejtuesit të SPAK, Altin Dumani, këtë herë me tone edhe më të ashpra, menjëherë pas paraqitjes në ambientet e Prokurorisë së Posaçme, në zbatim të masës së sigurisë “detyrim paraqitje”.
Nga ambientet ku paraqitet për të respektuar masën e vendosur ndaj tij, Berisha ka zgjedhur sërish të lëshojë akuza dhe epitete ndaj prokurorit që drejtoi për disa vite institucionin që po heton çështje të rëndësishme të korrupsionit dhe krimit të organizuar.
Gjatë deklaratës për mediat, kreu i PD-së e cilësoi SPAK-un si një “seksion special” të Partisë Socialiste, ndërsa për Altin Dumanin përdori termin “mercenar i Padrinos së Shqipërisë”, duke iu referuar kryeministrit Edi Rama.
Berisha nuk u mjaftua me akuzat ndaj institucionit, por lexoi edhe një mesazh me gjuhë fyese, ku përmendeshin emrat Altin Gjoka, Hajri Troplini dhe pesë persona të tjerë.
“Armikut të egër të pluralizmit politik dhe votës së lirë të shqiptarëve, mercenarit të Padrinos së Shqipërisë, Edvin Kristaq Xhelati, drejtësia vonon, por nuk harron”, deklaroi Berisha, duke përsëritur akuzat e tij ndaj Dumanit dhe drejtuesve të Prokurorisë së Posaçme.
Kjo nuk është hera e parë që kreu i opozitës përdor gjuhë të ashpër ndaj Altin Dumanit. Në dalje të mëparshme nga SPAK, Berisha e ka cilësuar atë si “mercenar”, “mashtrues” dhe me epitete të tjera, duke e akuzuar për veprim në interes të kryeministrit Edi Rama dhe për mënyrën se si janë trajtuar dosje të ndryshme hetimore.
Në maj të këtij viti, Berisha publikoi pretendime dhe dokumente që, sipas tij, ngrinin pikëpyetje mbi pasurinë dhe deklarimet e Dumanit gjatë procesit të vettingut. Edhe në gusht dhe tetor 2025, ai kishte vijuar akuzat publike ndaj ish-kreut të SPAK, duke e lidhur me çështje të ndryshme që, sipas tij, nuk ishin hetuar siç duhet. Këto pretendime janë deklarime të Berishës dhe nuk përbëjnë vetvetiu prova për shkelje nga ana e Dumanit.
Por përtej përplasjes politike dhe akuzave që kreu i PD-së ka zgjedhur të bëjë publikisht, mbetet një çështje që kërkon vëmendje. Deri ku mund të shkojë gjuha e një politikani ndaj një prokurori dhe një institucioni të pavarur të drejtësisë, pa pasur një reagim publik institucional?
Ku e gjen guximin Berisha që, sa herë paraqitet në SPAK, të përdorë këtë gjuhë ndaj ish-drejtuesit të institucionit dhe të akuzojë publikisht prokurorët për shërbim ndaj një force politike? A është kjo thjesht një formë e ushtrimit të lirisë së shprehjes dhe kritikës politike, apo një klimë presioni ndaj institucioneve të drejtësisë?
Nga ana tjetër, bie në sy mungesa e një reagimi publik nga SPAK ndaj këtyre deklaratave të përsëritura. Prokuroria e Posaçme nuk ka dhënë një përgjigje publike për deklaratat e sotme të Berishës. Natyrisht, një institucion drejtësie nuk ka detyrimin të përfshihet në çdo debat politik, por kur akuzat dhe sulmet personale përsëriten në mënyrë publike, lind nevoja për të sqaruar kufirin mes kritikës ndaj punës së prokurorisë dhe presionit ndaj përfaqësuesve të saj.
Një politikan ka të drejtë të kritikojë vendimet, hetimet dhe mënyrën e funksionimit të drejtësisë. Por kjo nuk e përjashton përgjegjësinë për gjuhën që përdor dhe as nevojën që akuzat konkrete të shoqërohen me prova e të trajtohen përmes mekanizmave ligjorë.
Pyetja mbetet, a do të vazhdojë SPAK të mos reagojë publikisht ndaj një serie deklaratash të tilla, ndërsa Berisha e përdor çdo dalje nga institucioni për të sulmuar drejtuesit dhe prokurorët e tij?
