Pas përfundimit të punimeve për 6 km të para të Autostradës “Tiranë–Durrës”, trafiku i mjeteve është përqendruar në zonën pranë mbikalimit të Rinasit, ku korsitë reduktohen në dy dhe krijohet ngarkesë e konsiderueshme në qarkullim.
Autoriteti Rrugor Shqiptar ka bërë të ditur se së shpejti do të ndërhyjë për të lehtësuar situatën e trafikut në këtë segment, përmes një procesi shpronësimi dhe ndërhyrjesh infrastrukturore.
Sipas kreut të ARRSH-së, Ami Kozeli, një karburant pranë ndarjes së rrugës në kthesën e Rinasit po pengon zgjerimin e qarkullimit, ndaj është marrë vendimi për shpronësim dhe prishje të tij, me qëllim hapjen e mëtejshme të rrugës dhe lehtësimin e trafikut drejt aeroportit.
Paralelisht, Kozeli ka apeluar drejtuesit e mjeteve që të mos përdorin korsinë e emergjencës, duke theksuar se bllokimi i saj rëndon më tej trafikun, sidomos në zonën ku rruga nga katër korsi reduktohet në dy.
Ajo ka njoftuar gjithashtu se pas përfundimit të sezonit veror do të nisë prishja e mbikalimit të Rinasit dhe ndërtimi i një strukture të re rreth 94 metra të gjatë, ndërsa gjatë punimeve trafiku do të devijohet përmes nyjes së Kasharit.
