Një prej qytetarëve që mori fjalën gjatë protestës së zhvilluar para Kryeministrisë ka bërë thirrje publike ndaj institucioneve të drejtësisë për të hetuar kryeministrin Edi Rama dhe pasurinë e tij, ndërsa ka kërkuar edhe dorëheqjen e kreut të qeverisë.

Nga podiumi i improvizuar i protestës, qytetari u shpreh se shqiptarët janë të bashkuar kundër asaj që e cilësoi si një sistem të korruptuar, duke theksuar se është detyrë e çdo qytetari të kërkojë llogari dhe ndryshim.

Ai iu drejtua gjithashtu SPAK, duke kërkuar hetimin e kryeministrit dhe të personave pranë tij, në një kohë kur, sipas tij, ka pretendime për presione ndaj institucioneve të drejtësisë.

Gjatë fjalës së tij, protestuesi deklaroi se qytetarët nuk kërkojnë privilegje, por drejtësi, ndërsa theksoi se populli shqiptar është sovrani dhe nuk mund të mbetet spektator në vendin e vet.

Në fund të fjalës, ai i bëri thirrje kryeministrit Rama të japë dorëheqjen, duke argumentuar se qytetarët e mbledhur në protestë kanë dalë kundër qeverisë dhe kërkojnë ndryshim politik.