Një video e transmetuar nga televizioni shtetëror iranian ka ngritur shqetësime në Shtetet e Bashkuara, pasi përmban elementë që interpretohen si kërcënim ndaj Barron Trump, djalit më të vogël të presidentit amerikan Donald Trump.
Sipas CNN, videoja rreth tre minuta e gjatë është transmetuar nga IRIB dhe shfaq disa prej vendeve që Barron Trump frekuenton, mes tyre edhe Trump Tower në Nju Jork.
Materiali përmban gjithashtu një pyetje me tone kërcënuese lidhur me vendin ku mund të vritej djali i presidentit amerikan. Në video përmendet edhe një shpërblim prej 10 milionë dollarësh.
Videoja duket se është pjesë e një fushate më të gjerë kërcënimesh ndaj Donald Trump dhe familjes së tij, në një kohë kur tensionet mes Uashingtonit dhe Teheranit mbeten të larta.
Shërbimi Sekret: Jemi në dijeni
Shërbimi Sekret i Shteteve të Bashkuara ka konfirmuar se është në dijeni të materialit dhe se po e shqyrton atë.
Zëdhënësi i agjencisë, Nate Herring, deklaroi se çdo material që mund të perceptohet si kërcënim ndaj personave nën mbrojtjen e Shërbimit Sekret merret në konsideratë.
“Për shkak të shqetësimit për sigurinë operacionale, ne nuk diskutojmë çështje të inteligjencës mbrojtëse”, tha Herring.
Autoritetet amerikane nuk kanë bërë të ditur nëse videoja përbën një kërcënim konkret apo nëse ka ndonjë informacion që tregon për një plan të drejtpërdrejtë për sulm ndaj Barron Trump.
Kërcënime të përsëritura ndaj familjes Trump
Sipas raportimeve, mediat iraniane kanë publikuar edhe më herët materiale dhe deklarata kërcënuese ndaj Donald Trump dhe familjes së tij.
Përballë këtyre kërcënimeve, masat e sigurisë për presidentin amerikan dhe familjarët e tij përshtaten në mënyrë të vazhdueshme, në varësi të informacioneve të inteligjencës dhe bashkëpunimit me agjencitë e tjera ligjzbatuese në SHBA dhe jashtë vendit.
Barron Trump është fëmija më i vogël i presidentit Donald Trump. Ai mbushi 20 vjeç në mars të këtij viti.
Videoja e transmetuar nga televizioni shtetëror iranian vjen në një klimë të tensionuar politike dhe diplomatike mes Iranit dhe Shteteve të Bashkuara, duke shtuar shqetësimet për sigurinë e familjes së presidentit amerikan.
