Këshilli Mbikëqyrës i Bankës së Shqipërisë vendosi të mërkurën të mbajë të pandryshuara normat bazë të interesit, duke vlerësuar se politika aktuale monetare mbetet e përshtatshme për ruajtjen e stabilitetit të çmimeve dhe nxitjen e rritjes ekonomike.
Guvernatori Gent Sejko njoftoi në konferencën për shtyp se norma bazë e interesit do të mbetet në 2.5%, norma e depozitës njëditore në 1.5% dhe ajo e kredisë njëditore në 3.5%.
“Ekonomia shqiptare ka vijuar të rritet, ndërsa parametrat kryesorë të stabilitetit ekonomik, monetar dhe financiar mbeten të konsoliduar,” deklaroi Sejko.
Inflacioni dhe tregu i punës
Sipas Bankës së Shqipërisë, inflacioni ka shënuar një rritje të lehtë gjatë tremujorit të tretë, duke arritur 2.4%, por vijon të mbetet nën objektivin prej 3%. Rritja inflacioniste është ndikuar nga çmimet e qirave dhe shërbimeve, ndërsa çmimet e ushqimeve kanë shënuar rënie.
Tregu i punës vijon të jetë i qëndrueshëm: punësimi në sektorin privat jobujqësor u rrit me 3.4%, paga mesatare me 9.5%, ndërsa papunësia mbetet në 8.5%, nivel historikisht i ulët.
Rritja ekonomike dhe kreditimi
Rritja ekonomike është mbështetur nga konsumi familjar, investimet private dhe turizmi, ndërsa sektorët e shërbimeve dhe ndërtimit kanë qenë më dinamikë. Ekonomia u rrit me 3.6% gjatë gjysmës së parë të vitit, sipas të dhënave të INSTAT.
Kredia për sektorin privat u rrit me 14% gjatë tremujorit të tretë, kryesisht në kredi në lekë dhe për investime të bizneseve, ndërsa cilësia e portofolit të kredisë mbetet e kënaqshme.
“Politika monetare e kujdesshme ka ndihmuar në uljen e primeve të rrezikut dhe në përmirësimin e kushteve të financimit,” tha Sejko.
Perspektiva dhe rreziqet
Banka e Shqipërisë parashikon që inflacioni të rikthehet në objektivin 3% gjatë gjysmës së parë të vitit 2026, ndërsa rritja ekonomike pritet të mbetet solide në horizontin afatmesëm.
Guvernatori paralajmëroi se panorama e rreziqeve mbetet komplekse, duke përmendur tensionet tregtare dhe gjeopolitike si faktorë potencial pasigurie. Rritja e shpejtë e pagave mund të ushtrojë presione shtesë mbi inflacionin.
“Vendimet tona të ardhshme do të kushtëzohen nga ecuria e pritjeve inflacioniste dhe zhvillimet e brendshme e ndërkombëtare,” theksoi Sejko.
Ai përfundoi duke vlerësuar se qëndrimi aktual i politikës monetare ofron një balancë të drejtë midis nxitjes së aktivitetit ekonomik dhe ruajtjes së stabilitetit të çmimeve.
