Kuvendi i Republikës së Kosovës nuk ka arritur as këtë herë të zgjedhë Kryeministrin e ri të vendit. Kandidati i vetëm i propozuar për mandatim, Glauk Konjufca nga Lëvizja Vetëvendosje, nuk ka marrë votat e mjaftueshme për të siguruar drejtimin e qeverisë së re.

Sipas rezultatit të shpallur në sallën e Kuvendit, për propozimin e Vetëvendosjes votuan vetëm 56 deputetë, ndërsa 4 abstenuan dhe 53 votuan kundër. Me këtë rezultat, Konjufca mbetet pa shumicën e nevojshme parlamentare për të marrë drejtimin e ekzekutivit.

Ky është dështimi i radhës për krijimin e Qeverisë së re, duke thelluar edhe më tej krizën institucionale që ka përfshirë vendin pas mosarritjes së dakordësisë politike mes partive kryesore.

Me mungesën e shumicës së domosdoshme, sipas Kushtetutës, Kosova tashmë detyrohet të shkojë drejt zgjedhjeve të parakohshme parlamentare, të cilat pritet të shpallen zyrtarisht nga Presidentja e vendit pas procedurave të nevojshme kushtetuese.

Klasa politike në Prishtinë tashmë përballet me një fazë të re të paqartësisë, ndërsa partitë pritet të nisin përgatitjet për garën e re elektorale, që mund të ridimensionojë balancat e fuqisë në skenën politike të Kosovës.

Në Vetëvendosje, formacion që propozoi Konjufcën, dështimi shihet si pasojë e mungesës së bashkëpunimit nga partitë e tjera, ndërsa opozita thekson se kandidatura e ofruar nuk kishte potencial për konsensus të gjerë.

Zgjedhjet e reja pritet të mbahen brenda afateve ligjore, me qytetarët që do të duhet të kthehen sërish në kutitë e votimit për të përcaktuar drejtimin e ardhshëm politik të vendit.