Pagesat me kartë po rriten me ritme të shpejta dhe kanë arritur nivelet më të larta historike në Shqipëri. Sipas të dhënave më të fundit të Bankës së Shqipërisë, në tremujorin e tretë të vitit 2025 (korrik–shtator) u kryen 6.8 milionë pagesa me kartë, me një rritje të fortë prej 36% krahasuar me të njëjtën periudhë të një viti më parë.
Në terma vlerash, pagesat me kartë për këtë tremujor kapën shifrën 33 miliardë lekë, që përfaqëson një rritje të konsiderueshme prej 55%.
Rekord edhe në 9-mujor: kartat përbëjnë gjysmën e të gjitha veprimeve
Në total për 9-mujorin e këtij viti, numri i pagesave me kartë arriti 19.4 milionë transaksione, me një vlerë totale prej 45 miliardë lekësh.
Për herë të parë, numri i pagesave me kartë në pikat elektronike të shitjes (POS) ka kaluar numrin e tërheqjeve të parasë fizike nga bankomatet. Sipas statistikave zyrtare, gjatë 9-mujorit:
51% e të gjitha veprimeve bankare kanë qenë pagesa me kartë,
ndërsa tërheqjet cash kanë rënë nën 43% të totalit.
Ky ndryshim sinjalizon një zhvendosje të qartë të zakoneve të konsumatorëve drejt përdorimit të pagesave elektronike.
Cash-i vazhdon të dominojë në vlerë
Megjithë rritjen e fuqishme të përdorimit të kartave, tërheqjet fizike të parasë vazhdojnë të mbajnë peshën më të madhe në vlerë. Për 9-mujorin:
65% e vlerës totale të veprimeve vijon të realizohet përmes tërheqjeve cash,
ndërsa pagesat me kartë përmes terminaleve POS përbëjnë 17% të vlerës totale.
Kjo tregon se, ndonëse konsumatorët po kryejnë më shumë transaksione me kartë, shuma mesatare për transaksion mbetet më e lartë në tërheqjet e parasë fizike.
Rritet numri i bizneseve që pranojnë pagesa elektronike
Tendenca e shtimit të pagesave me kartë po shoqërohet me një zgjerim të vazhdueshëm të infrastrukturës së pranimit. Numri i terminaleve POS në vend arriti në fund të tremujorit të tretë 29,260 njësi, një tregues i qartë se gjithnjë e më shumë biznese po u hapin rrugë pagesave pa cash.
Rritja e kërkesës, nxitja për formalizim dhe ndryshimet në sjelljen e konsumatorëve po e shtyjnë tregun drejt një ekonomie gjithnjë e më të dixhitalizuar.
