Gjykata e Durrësit ka vendosur lirimin me kusht për Arbër Paplekajn gjatë një seance të zhvilluar dy ditë më parë, duke marrë parasysh kërkesën e mbrojtjes dhe faktin që ai ka vuajtur më shumë se gjysmën e dënimit të tij.

Paplekaj po përballet me një dënim me burg prej 7 vitesh për vrasjen e Pjerin Xhuvanit, ngjarje e ndodhur në Elbasan në prill të vitit 2021, pak ditë para zgjedhjeve parlamentare. Dënimi i tij përfundimtar u vendos nga Gjykata e Apelit, e cila uli dënimin pasi ndryshoi cilësimin e veprës penale nga vrasje në rrethana cilësuese në vrasje në kushtet e tronditjes psikike.

Më 11 nëntor të këtij viti, Paplekaj përfitoi edhe një ulje dënimi prej 90 ditësh nga e njëjta gjykatë, një përfitim që shtrihet në vitin e fundit të vuajtjes së dënimit. Kjo ishte një nga arsyet që mundësoi lirimin e tij me kusht.

Mbështetur në këto vendime, mbrojtja e Paplekajt kishte kërkuar që ai të lirohej që në fillim të vjeshtës, por për shkak të shtyrjeve dhe moszhvillimit të disa seancave, ky proces u vonua.

Lirimi me kusht i Arbër Paplekajt vjen pasi ai ka përmbushur pjesën më të madhe të dënimit dhe është vlerësuar nga gjykata se mund të integrohet sërish në shoqëri, duke respektuar kushtet e përcaktuara nga ligji për këtë masë.