Kreu i Partise Demokratike te Shqipërisë, Sali Berisha, mbajti fjalën e tij në protestën e opozitës, duke e lidhur tubimin me përkujtimin e 20 shkurtit 1991, një nga datat simbol të rrëzimit të diktaturës komuniste në Shqipëri.
Në fjalën drejtuar qytetarëve të mbledhur në shesh dhe mbështetësve në mbarë vendin e diasporë, Berisha përshëndeti protestuesit dhe e cilësoi 20 shkurtin si një ditë të shënuar të historisë kombëtare, kur qytetarët u bashkuan në mbështetje të grevës së studentëve dhe marshuan drejt qendrës së Tiranës për të rrëzuar simbolin e regjimit komunist.
Ai e përshkroi atë moment si kulmin e guximit qytetar dhe një betejë paqësore që, sipas tij, përmbysi kultin e diktatorit dhe hapi rrugën për lirinë dhe demokracinë në vend. Berisha shprehu nderim për protestuesit e asaj kohe, duke theksuar se sakrifica e tyre mbetet frymëzim për zhvillimet politike të sotme.
Në vijim, lideri demokrat krahasoi situatën aktuale politike me periudhën para ndryshimeve demokratike, duke akuzuar qeverinë për keqqeverisje, korrupsion dhe manipulim të zgjedhjeve. Sipas tij, shqiptarët sot përballen me një realitet që në disa aspekte i ngjan të kaluarës.
Berisha deklaroi se opozita e përkujton këtë datë jo vetëm me mirënjohje, por edhe me zotimin për ndryshim politik. Ai u shpreh se kryeministri Rama “i ka kohërat e numëruara”, duke shtuar se beteja e opozitës synon votën e lirë, dinjitetin qytetar dhe një të ardhme më të mirë për vendin.
