Debati i fortë që ka shpërthyer ditët e fundit rreth projektit të parashikuar në Zvërnec dhe kundërshtimeve që kanë shoqëruar këtë investim ka kaluar kufijtë e Shqipërisë, duke tërhequr vëmendjen edhe të mediave ndërkombëtare. Në këtë sfond polemikash, kryeministri Edi Rama ka reaguar sërish publikisht, duke mbrojtur projektin dhe duke kundërshtuar akuzat e ngritura nga kundërshtarët e tij.
Në një intervistë për Al Jazeera, Rama e cilësoi investimin si një mundësi të rëndësishme për zhvillimin ekonomik të vendit, duke theksuar se bëhet fjalë për një projekt me vlerë rreth 4 miliardë dollarë.
Sipas kreut të qeverisë, investimi përfaqëson një mundësi të jashtëzakonshme për ekonominë shqiptare dhe për perspektivën e zhvillimit të vendit, ndërsa debatet që e kanë shoqëruar nuk ndryshojnë natyrën dhe rëndësinë e tij.
Kryeministri u ndal veçanërisht te pretendimet se qeveria po transferon apo po shet prona publike në favor të investitorëve. Rama mohoi një gjë të tillë, duke deklaruar se territori ku parashikohet të zhvillohet projekti është pronë private dhe se marrëveshja është realizuar mes subjekteve private.
“Sa i përket projektit që ka shkaktuar gjithë këtë reagim dhe polemikë në mbarë botën, bëhet fjalë për pronë private. Nuk bëhet fjalë për tokë publike që qeveria shqiptare po e jep duke e shitur vendin. Është pronë private. Është një shprehje interesi e bazuar në një marrëveshje private mes palëve private, në të cilën qeveria shqiptare nuk ka asnjë rol”, deklaroi Rama.
Kreu i qeverisë argumentoi se investimi nuk duhet parë përmes polemikave politike, por si një nismë që mund të sjellë zhvillim ekonomik, vende të reja pune dhe përfitime afatgjata për zonën dhe ekonominë shqiptare në tërësi.
Deklaratat e Ramës vijnë në një kohë kur projekti në Zvërnec është kthyer në një nga temat më të debatuara në vend. Kundërshtarët e projektit kanë organizuar protesta dhe kanë ngritur shqetësime për ndikimin që mund të ketë investimi në mjedis, biodiversitet dhe zonat e mbrojtura, ndërsa mbështetësit e tij argumentojnë se ai mund të shndërrohet në një motor zhvillimi për turizmin dhe ekonominë lokale.
Përplasja rreth projektit ka prodhuar reagime të shumta politike dhe qytetare, ndërsa diskutimet janë shtrirë tashmë edhe në arenën ndërkombëtare. Në këtë klimë, qeveria shqiptare vijon të mbrojë projektin si një investim strategjik me ndikim pozitiv për vendin, ndërsa grupet kundërshtare kërkojnë transparencë të plotë dhe rishikim të procedurave që lidhen me zhvillimin e tij.
Intervista e kryeministrit për Al Jazeera përbën një tjetër përpjekje për të sqaruar pozicionin e qeverisë dhe për të kundërshtuar akuzat se shteti shqiptar po luan rol në transferimin e pronave apo në favorizimin e interesave private në zonën e Zvërnecit.
