Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Pas raportimeve në media se Shtetet e Bashkuara kanë hequr statusin “non grata” për kreun e Partisë Demokratike, Sali Berisha, Ambasada amerikane në Tiranë ka shmangur komentet mbi këtë çështje.
E pyetur lidhur me pretendimet për ndryshimin e statusit të liderit të opozitës, Ambasada e SHBA-së nuk ka dhënë asnjë qëndrim zyrtar, duke referuar çdo pyetje te Departamenti Amerikan i Shtetit.
Deri më tani, Departamenti i Shtetit nuk ka publikuar asnjë vendim apo njoftim zyrtar që të konfirmojë heqjen e masës së shpalljes “non grata” ndaj Sali Berishës dhe anëtarëve të familjes së tij.
Raportimet për heqjen e sanksioneve kanë ngjallur reagime të shumta në skenën politike shqiptare, megjithatë mungesa e një konfirmimi zyrtar nga autoritetet amerikane lë ende të paqartë statusin aktual të ish-kryeministrit shqiptar.
Pritet që në orët ose ditët në vijim të ketë një reagim nga Departamenti Amerikan i Shtetit, i cili mbetet institucioni përgjegjës për vendimet që lidhen me shpalljet e zyrtarëve të huaj si të papërshtatshëm për hyrje në Shtetet e Bashkuara.
