Qeveria shqiptare ka miratuar këtë të premte, në parim, një marrëveshje huaje me Shtetet e Bashkuara të Amerikës me vlerë 302 milionë dollarë, në kuadër të programit amerikan të Financimit të Jashtëm Ushtarak (Foreign Military Financing – FMF).
Sipas vendimit të Këshillit të Ministrave, marrëveshja do të nënshkruhet ndërmjet Republikës së Shqipërisë, të përfaqësuar nga Ministria e Financave, dhe qeverisë amerikane, të përfaqësuar nga Agjencia e Bashkëpunimit për Sigurinë e Mbrojtjes (DSCA).
Fondet e akorduara përmes kësaj skeme financimi do të përdoren për forcimin e kapaciteteve mbrojtëse dhe modernizimin ushtarak të vendit, në përputhje me programet që mbështeten nga FMF.
Në vendimin e miratuar thuhet se Këshilli i Ministrave ka dhënë “miratimin, në parim, të marrëveshjes së huas direkte, ndërmjet Republikës së Shqipërisë, përfaqësuar nga Ministria e Financave, dhe Shteteve të Bashkuara të Amerikës, përfaqësuar nga Agjencia e Bashkëpunimit për Sigurinë e Mbrojtjes (DSCA), në kuadër të financimit të jashtëm ushtarak (FMF).”
Dokumenti përcakton se vlera e huasë arrin në 302 milionë dollarë amerikanë.
Marrëveshja konsiderohet një nga instrumentet më të rëndësishme të bashkëpunimit në fushën e mbrojtjes mes Shqipërisë dhe Shteteve të Bashkuara, duke synuar rritjen e kapaciteteve të Forcave të Armatosura dhe avancimin e procesit të modernizimit të tyre.
