Policia e Shtetit ka bërë disa ndryshime në drejtimin e drejtorive vendore dhe komisariateve në vend.
Me urdhër të Drejtorit të Përgjithshëm të Policisë së Shtetit, Skënder Hita, janë kryer disa transferime dhe emërime të reja.
Dritan Lena, i cili deri tani mbante detyrën e Shefit të Sektorit të Planifikimit Operacional në Drejtorinë e Forcës Kombëtare të Sigurisë, është transferuar në Berat, ku do të drejtojë Drejtorinë Vendore të Policisë.
Ndryshime ka edhe në drejtimin e komisariateve.
Saimir Shkambaj, deri tani Shef i Komisariatit të Policisë Tropojë, është transferuar në Sarandë, ku do të marrë drejtimin e komisariatit.
Në vend të tij në Tropojë është komanduar Komisar Andi Kano, i cili deri tani ka qenë Shef i Hetimit të Krimeve në këtë komisariat.
Ndërkohë, Feliks Hoda, i cili drejtonte Komisariatin e Policisë Sarandë, është transferuar në Dibër, ku është emëruar Shef i Komisariatit të Policisë Dibër.
Ndryshimet prekin kështu katër struktura të Policisë së Shtetit, ndërsa urdhrat e rinj kanë hyrë në fuqi me vendimin e Drejtorit të Përgjithshëm.
