Liderët e vendeve anëtare të NATO-s kanë miratuar Deklaratën Përfundimtare të Samitit të Ankarasë, duke riafirmuar angazhimin për mbrojtjen kolektive sipas Nenit 5 të Traktatit të Uashingtonit, forcimin e kapaciteteve ushtarake dhe mbështetjen afatgjatë për Ukrainën.
Në dokumentin e miratuar, Aleanca thekson se një sulm ndaj njërit prej vendeve anëtare konsiderohet sulm ndaj të gjithëve, duke e cilësuar unitetin, solidaritetin dhe fuqinë kolektive si bazën e sigurisë euroatlantike.
Deklarata nënvizon se Rusia mbetet një kërcënim afatgjatë për sigurinë dhe stabilitetin euroatlantik, ndërsa NATO deklaron se do të vijojë forcimin e kapaciteteve mbrojtëse përmes investimeve të reja, teknologjive të avancuara dhe zgjerimit të industrisë së mbrojtjes.
Sipas dokumentit, gjatë vitit 2025 vendet evropiane të NATO-s dhe Kanadaja kanë rritur investimet në nevojat bazë të mbrojtjes me më shumë se 139 miliardë dollarë. Në Samitin e Ankarasë janë shpallur gjithashtu mbi 50 miliardë dollarë kontrata të reja për prokurime ushtarake dhe zhvillimin e kapaciteteve të përbashkëta prodhuese.
Aleatët theksojnë se po punojnë për modernizimin e Aleancës përmes zhvillimit të sistemeve të avancuara, përfshirë mbrojtjen ajrore dhe raketore, sistemet pa pilot, inteligjencën artificiale, kapacitetet kibernetike dhe teknologjitë hapësinore.
Një pjesë e rëndësishme e deklaratës i kushtohet Ukrainës. NATO riafirmon mbështetjen për Kievin, duke deklaruar se ndihma duhet të jetë e qëndrueshme dhe afatgjatë.
Aleatët janë zotuar të ofrojnë gjatë vitit 2026 rreth 70 miliardë euro ndihmë ushtarake, pajisje dhe trajnime për Ukrainën, si dhe të ruajnë të paktën të njëjtin nivel mbështetjeje edhe në vitin 2027.
Në deklaratë përfshihet edhe qëndrimi i Aleancës ndaj Iranit, ku theksohet se Teherani nuk duhet të zotërojë armë bërthamore dhe i kërkohet të respektojë lirinë e lundrimit në Ngushticën e Hormuzit.
Deklarata e Samitit të Ankarasë mbyllet me falënderimin ndaj Turqisë për mikpritjen dhe me pritshmërinë për takimin e ardhshëm të Aleancës.
