Komisioni parlamentar rrëzoi kërkesën e paraqitur nga opozita për shkarkimin e Presidentit të Republikës, Bajram Begaj. Kërkesa u hodh sot në votim dhe rezultoi me 5 vota pro dhe 9 kundër, duke u refuzuar për mungesë të mbështetjes së nevojshme.
Opozita kishte paraqitur 7 pika akuzash, të cilat, sipas saj, përbënin shkelje të Kushtetutës dhe ligjeve nga ana e Kreut të Shtetit. Konkretisht, opozita pretendoi se Presidenti Begaj:
-
Dekretoi zgjedhjet në Tiranë në kundërshtim me Kushtetutën;
-
Ndërhyri në mandatin e anëtarëve të Gjykatës Kushtetuese, duke cenuar pavarësinë e tyre;
-
Dekretoi në shkelje ligjin për Komisionet Hetimore;
-
Dekretoi ministren virtuale të quajtur “Diella”;
-
Nuk ndaloi trupën diplomatike nga përfshirja në fushatën zgjedhore të vitit 2025;
-
Kabineti i tij ndërhyri në procesin e administrimit të zgjedhjeve;
-
Djali i tij u punësua në mënyrë fiktive në një kompani sigurimesh që përfiton tendera nga Presidenca, ndërsa vetë Begaj figuron i punësuar në një klinikë private.
Pas shqyrtimit të materialeve, shumica e anëtarëve të komisionit vlerësuan se nuk ka elementë që justifikojnë shkarkimin e Presidentit. Me këtë vendim, procesi konsiderohet i mbyllur, ndërsa opozita ka paralajmëruar se do të vijojë betejën politike dhe ligjore për, siç thotë, “mbrojtjen e Kushtetutës”.
