Në prag të finales së Ligës së Evropës mes Tottenham Hotspur dhe Manchester United, trajneri i Spurs, Ange Postecoglou, mbajti një konferencë për shtyp në stadiumin “San Mames” në Bilbao. Me një sezon sfidues në Ligën Premier, ku Spurs ndodhen në vendin e 17-të, trajneri australian u shfaq i vendosur dhe i fokusuar për ndeshjen vendimtare.
Gjatë konferencës, Postecoglou reagoi me forcë ndaj kritikeve, duke mohuar titullin e dhënë nga një gazetar që e përshkroi si “kloun”.
“Mos u shqetësoni për të ardhmen time, shoku. E ardhmja ime është e sigurt, për sa kohë që shëndeti im mbetet i mirë, familja ime është pranë meje, dhe miqtë e mi janë aty. Mos u shqetësoni. Flini rehat. Do të jem mirë”.
Trajneri australian theksoi gjithashtu rëndësinë e finales për skuadrën dhe tifozët. Një fitore në “San Mamés” do të përfaqësonte titullin e parë të madh për Tottenhamin që nga viti 2008 dhe do të siguronte një vend në Ligën e Kampionëve për sezonin e ardhshëm.
“Kjo finale është një moment historik për klubin dhe për tifozët tanë. Është një mundësi për të fituar një trofe që do të na rikthejë në vendin ku i takojmë, dhe për të siguruar një vend në Ligën e Kampionëve”.
“Ne e dimë sa shumë kjo do të thotë për të gjithë në Tottenham, ndaj do të japim gjithçka në fushë për të arritur këtë ëndërr”, përfundoi trajneri i Spurs.
Finalja e Ligës së Evropës do të zhvillohet në “San Mames”, me fillim në orën 21:00. Tifozët e Tottenhamit shpresojnë që nën drejtimin e Ange Postecoglou, skuadra të kthehet në rrugën e suksesit dhe të shkruajë një kapitull të ri në historinë e klubit
