Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Konflikti në Lindjen e Mesme pritet të ketë ndikim negativ në ecurinë ekonomike të Shqipërisë, duke ngadalësuar ritmet e rritjes dhe duke ushtruar presion mbi çmimet, veçanërisht të energjisë dhe karburanteve.
Guvernatori i Bankës së Shqipërisë, Gent Sejko, deklaroi se zhvillimet në tregjet ndërkombëtare, të ndikuara nga tensionet dhe lufta, kanë sjellë shtrenjtim të naftës dhe energjisë, çka pritet të reflektohet në rritjen e inflacionit mbi objektiv gjatë vitit 2026.
Sipas tij, ndikimi në ekonominë shqiptare do të varet në mënyrë të drejtpërdrejtë nga kohëzgjatja dhe intensiteti i konfliktit, duke theksuar se pasiguritë gjeopolitike mbeten një faktor i rëndësishëm rreziku për stabilitetin ekonomik.
Në këtë kuadër, Këshilli Mbikëqyrës i Bankës së Shqipërisë vendosi të mbajë të pandryshuar normën bazë të interesit, duke theksuar se do të vijojë të ndjekë nga afër zhvillimet në tregjet ndërkombëtare dhe efektet e tyre në ekonominë vendase.
Pavarësisht sfidave të jashtme, ekonomia shqiptare ka shënuar një ecuri pozitive gjatë tremujorit të parë të vitit 2026, e mbështetur nga rritja e sektorit të turizmit, zgjerimi i eksporteve dhe rritja e investimeve.
