Shtetet e Bashkuara kanë zyrtarizuar miratimin e një kredie prej 302 milionë dollarësh për Shqipërinë, në kuadër të programit Foreign Military Financing (FMF), duke konfirmuar edhe nënshkrimin e marrëveshjes nga pala shqiptare.
Sipas autoriteteve amerikane, fondet synojnë të mbështesin Shqipërinë në përmbushjen e objektivave të përcaktuara në Angazhimin e Mbrojtjes së Hagës, i cili parashikon rritjen graduale të investimeve në mbrojtje deri në 5% të Prodhimit të Brendshëm Bruto deri në vitin 2035.
Financimi do të shërbejë për modernizimin e Forcave të Armatosura shqiptare, duke mundësuar blerjen e pajisjeve dhe sistemeve ushtarake të prodhuara në SHBA, si edhe për rritjen e kapaciteteve mbrojtëse në kuadër të sigurisë euroatlantike.
Në deklaratën amerikane theksohet se kjo marrëveshje pasqyron partneritetin strategjik mes Uashingtonit dhe Tiranës. Si vend anëtar i NATO-s, Shqipëria konsiderohet një aleate e rëndësishme, me kontribut të vazhdueshëm në çështjet e sigurisë dhe politikës së jashtme.
Po ashtu, SHBA vlerëson angazhimin e Shqipërisë në mekanizmat ndërkombëtarë të sigurisë, përfshirë pjesëmarrjen e saj si anëtare themeluese e Bordit të Paqes të Presidentit Donald Trump.
Kredia prej 302 milionë dollarësh shihet si një investim i rëndësishëm për rritjen e aftësive mbrojtëse të vendit dhe për thellimin e mëtejshëm të bashkëpunimit strategjik mes Shqipërisë dhe Shteteve të Bashkuara.
