Ish-kryeministri Sali Berisha ka publikuar një listë të gjatë aktivitetesh dhe promovimesh publike të zhvilluara nga qeveria dhe drejtues vendorë në prag të zgjedhjeve të 11 majit, të cilat, sipas tij, përbëjnë shkelje flagrante të Kodit Zgjedhor dhe standardeve ndërkombëtare për zgjedhje të lira dhe të ndershme.
Sipas Berishës, në periudhën e ndalimeve të aktiviteteve publike me efekt elektoral (siç përcaktohet në nenin 91/3 të Kodit Zgjedhor), qeveria organizoi një valë aktivitetesh propagandistike, të cilat e përfshijnë që nga projekte infrastrukturore, inaugurime shkollash, investime në rrugë dhe spitale, deri te aktivitete të promovuara me praninë e vetë kryeministrit dhe ministrave të kabinetit.
Fakte të paraqitura nga Berisha
Në Durrës, kryebashkiakja Emiriana Sako u shfaq publikisht në mbi 15 aktivitete midis janarit dhe shkurtit, përfshirë shpallje investimesh për rrugë, shkolla, infrastrukturë urbane dhe madje edhe promovime për varreza.
Kryeministri Rama, sipas Berishës, mori pjesë në promovime si:
Autostrada Elbasan–Qafë Thanë (13 shkurt)
Spitali i Mirditës (28 shkurt)
Projekti urban në Patos (6 shkurt)
Inaugurimi i një shkolle në Kukës (5 shkurt)
Zëvendëskryeministrja Belinda Balluku përmendet për disa paraqitje publike që lidhen me rrugë dhe tunele në të gjithë vendin gjatë muajit shkurt.
Në Berat, Ervin Demo shfaqet në një seri aktivitetesh promovuese midis 3 dhe 19 shkurtit, për projekte të ndriçimit, infrastrukturës rrugore dhe parqeve publike.
Në Lezhë, Pjerin Ndreu është denoncuar për ndërhyrje urbane në prag të zgjedhjeve, duke përfshirë punime në rrugë e ura.
Akuzat e Berishës
“Këto aktivitete janë planifikuar dhe ekzekutuar për të ndikuar drejtpërdrejt në elektorat, duke shkelur jo vetëm ligjin shqiptar por edhe standardet e OSBE/ODIHR dhe Komisionit të Venecias për ndarjen e shtetit nga partia në fushatat elektorale”, u shpreh Berisha.
Ai e cilësoi këtë si një “makineri të organizuar propagandistike shtetërore”, me qëllim përfitimin elektoral të partisë në pushtet dhe e vuri theksin te mungesa e reagimit nga institucionet e drejtësisë, veçanërisht nga SPAK, duke akuzuar kreun Altin Dumani si “avokat të krimit elektoral”.
