Shteti shqiptar përballet me një tjetër procedurë arbitrazhi ndërkombëtar. Fatura e kësaj çështjeje është shfaqur në shpenzimet e Ministrisë së Turizmit, Kulturës dhe Sportit, e cila gjatë muajit gusht ka kryer pagesa prej rreth 76.6 milionë lekësh, ose afërsisht 800 mijë euro.
Të dhënat janë publikuar nga Spending.data.al, platforma e AIS, e cila pasqyron shpenzimet e institucioneve publike.
Sipas dokumenteve të pagesave, një pjesë e shumës lidhet me paradhënien për kostot e një gjyqi ndërkombëtar të arbitrazhit.
Pagesa më e madhe është kryer përmes urdhrit nr. 674, datë 30 gusht 2026. Shuma është 57.78 milionë lekë dhe në përshkrim përcaktohet si paradhënie për kostot e procedurës së arbitrazhit. Në dokumentacion përmendet procedura me numër 29714/ICA7, ndërsa shuma është konvertuar në 700,480 dollarë.
Kjo pagesë nuk përbën dëmshpërblim dhe nuk do të thotë se shteti shqiptar ka humbur çështjen. Bëhet fjalë për një paradhënie që lidhet me kostot e zhvillimit të procedurës së arbitrazhit.
Krahas kësaj pagese, Ministria ka kryer edhe një tjetër prej 18.8 milionë lekësh, e regjistruar si shpenzim arbitrazhi për shërbime ligjore.
Të dyja pagesat së bashku arrijnë në rreth 76.6 milionë lekë.
Nga të dhënat e publikuara në Thesar nuk bëhet e qartë se cili është subjekti që ka përfituar pagesën për shërbimet ligjore. Po ashtu, dokumentet nuk sqarojnë nëse pagesa prej 18.8 milionë lekësh lidhet me të njëjtën procedurë arbitrazhi, të identifikuar me numrin 29714/ICA7, apo me një çështje tjetër.
Në këtë mënyrë, ajo që konfirmohet nga dokumentet financiare është se buxheti i shtetit ka paguar gjatë gushtit një shumë prej 76.6 milionë lekësh për shpenzime të lidhura me arbitrazhin dhe shërbimet ligjore, ndërsa procedura ndërkombëtare vijon të jetë në zhvillim.
