Këtë të martë është mbledhur Komisioni i Posaçëm i Reformës Zgjedhore, ku Partia Demokratike ka kërkuar rikthimin e koalicioneve parazgjedhore sipas modelit të mëparshëm.

Gjatë mbledhjes, deputeti i PD-së, Oerd Bylykbashi, e cilësoi sistemin aktual zgjedhor si “toksik” për partitë politike dhe demokracinë në vend. Sipas tij, ky sistem nuk i shërben interesave të qytetarëve shqiptarë dhe pengon funksionimin normal të partive, si në parlament ashtu edhe në qeveri.

“Ky sistem është toksik për pluralizmin dhe demokracinë. Nuk ka lidhje me atë që i duhet shqiptarëve dhe vret funksionimin e partive në parlament dhe qeveri. Ky sistem duhet të largohet patjetër. Duhet një diskutim i hapur politik për ndryshimet e nevojshme,” u shpreh Bylykbashi.

Ai theksoi gjithashtu se sistemi aktual nuk mund të riparohet më, duke e cilësuar si një model “hibrid”, ndërsa kërkoi që çdo ndryshim në rregullat zgjedhore të bëhet vetëm përmes konsensusit politik.

Nga ana tjetër, Partia Demokratike e konsideron të papranueshëm nxitimin për zhvillimin e një referendumi, duke kërkuar që çdo diskutim mbi këtë çështje të zhvillohet brenda komisionit dhe jo përmes draftesh të njëanshme.

Debati për reformën zgjedhore mbetet një nga çështjet më të rëndësishme politike në vend, ndërsa palët pritet të vijojnë diskutimet për gjetjen e një marrëveshjeje të përbashkët.