Ish-ministri i Financave, Arben Malaj, ka hedhur akuza të forta ndaj Ministrisë së Financave, duke pretenduar se mungesa e nxjerrjes së akteve nënligjore për hapjen e basteve sportive po sjell pasoja të rënda fiskale dhe rritje të evazionit.

Në një reagim publik, Malaj deklaron se mbyllja e basteve që prej vitit 2019 ka bërë që ky aktivitet të vijojë në mënyrë informale, duke gjeneruar sipas tij qindra milionë euro që nuk deklarohen dhe nuk taksohen.

Ai akuzon institucionet përgjegjëse se po vonojnë qëllimisht procesin e ligjërimit të këtij aktiviteti, duke ngritur dyshime për ndikim të grupeve kriminale në këtë sektor.

Sipas Malajt, kjo situatë përbën një “rrezik të lartë për kapjen e politikave fiskale nga interesa kriminale” dhe kërkon ndërhyrje urgjente nga Prokuroria e Posaçme (SPAK).

Ai shton se Ministria e Financave nuk po publikon të dhëna të plota mbi përfituesit e ndryshimeve fiskale, përfshirë uljen e tatimit mbi dividendin dhe masat e ashtuquajtura të “paqes fiskale”, duke ngritur shqetësime për mungesë transparence.

Në reagimin e tij, ish-ministri prek gjithashtu çështjen e furnizimit të jahteve luksoze me karburant pa taksa, duke e cilësuar si një praktikë të diskutueshme që, sipas tij, nuk ka detyrim ndërkombëtar.

Malaj argumenton se interpretimi i përdorur nga autoritetet shqiptare mbi konventat ndërkombëtare është i zgjeruar dhe shpesh përdoret për të favorizuar turizmin luksoz, në dëm të interesit publik dhe sektorëve prodhues si bujqësia.

Ai thekson se në disa vende të Bashkimit Evropian, përfitime të tilla janë kufizuar përmes rregullave strikte dhe kontrolleve të forta mbi përdorimin e karburantit për mjete luksoze.

Në përfundim, Malaj i bën thirrje institucioneve që të rishikojnë politikat fiskale dhe të rrisin transparencën, duke paralajmëruar se situata aktuale mund të dëmtojë seriozisht ekonominë dhe besimin publik.