Autoriteti Kombëtar i Ushqimit ka ngritur alarmin për një suplement ushqimor të importuar nga Gjermania, pasi analizat kanë konfirmuar praninë e bakterit të rrezikshëm Salmonella spp, që përbën risk serioz për shëndetin e njeriut.
Bëhet fjalë për produktin “Moringa organic”, i cili i përket kategorisë së suplementeve ushqimore dhe ushqimeve dietike. Njoftimi për rrezikun është përcjellë në Shqipëri përmes sistemit europian të sigurisë ushqimore RASFF.
Të dhënat e produktit të rrezikshëm
Sipas informacionit zyrtar, produkti i identifikuar ka këto specifika:
- Emri: Moringa organic
- Lot: C 12105
- Data e skadencës: 28.06.2028
- Sasia e importuar: 12 njësi nga 125 gram
- Operatori eksportues: DRASANVI, SL
- Importues në Shqipëri: “Espana Pharm” sh.p.k
Çfarë është gjetur në terren
Gjatë kontrolleve të kryera nga AKU, është konstatuar se 6 njësi të produktit ndodheshin ende në subjekt dhe janë bllokuar për asgjësim si dhe pjesa tjetër e sasisë rezulton të jetë shitur tek konsumatorët.
Autoriteti bën me dije se operatori i biznesit ushqimor ka vendosur njoftime informuese në pikat e shitjes për të paralajmëruar qytetarët.
Autoriteti Kombëtar i Ushqimit u ka bërë thirrje konsumatorëve që nëse e kanë blerë këtë produkt, të mos e konsumojnë dhe ta kthejnë pranë pikave të shitjes.
Sipas AKU, produkti përbën rrezik për shëndetin dhe duhet të tërhiqet nga përdorimi deri në një njoftim të dytë zyrtar.
