Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Gjykata ka rrëzuar pesë kërkesa të paraqitura nga mbrojtja e kryebashkiakut të Tiranës, Erion Veliaj, gjatë seancës së fundit gjyqësore.
Ndër kërkesat e refuzuara ishte ajo për transmetim live të seancës. Trupi gjykues e konsideroi kërkesën të përsëritur, duke theksuar se megjithëse seancat janë publike, kjo nuk nënkupton detyrim për transmetim të drejtpërdrejtë në media.
Gjykata rrëzoi gjithashtu kërkesën që i pandehuri të nxirrej nga ambienti i ndarë me xham, duke argumentuar se një masë e tillë nuk cenon të drejtat procedurale dhe lidhet me garantimin e mbarëvajtjes së procesit.
Po ashtu, u refuzua kërkesa për zhvillimin e seancave më shpesh se një herë në javë, si dhe kërkesat që lidhen me provat digjitale, për të cilat gjykata u shpreh se janë trajtuar më herët në vendime të mëparshme.
Në të njëjtën çështje, për shkak të një kërkese të mbrojtjes së një prej të pandehurve të tjerë, Ajola Xoxa, gjykata vendosi shtyrjen e seancës për datën 23 qershor, në orën 10:00.
Ndërkohë, është bërë e ditur se janë pezulluar afatet e paraburgimit për Erion Veliajn, në kuadër të ecurisë procedurale të çështjes.
