Autoritetet kanë ndërmarrë një seri ndryshimesh në drejtimin e institucioneve të vuajtjes së dënimit, në kuadër të rritjes së sigurisë dhe përmirësimit të menaxhimit në sistemin penitenciar.

Në IEVP Fushë-Krujë është riorganizuar zinxhiri komandues, ku drejtori aktual Apostol Luca është liruar nga detyra. Në vend të tij është emëruar Ervis Dedej, i cili ka një eksperiencë të gjatë në sistemin e burgjeve.

Po ashtu, në këtë institucion është emëruar si Shef i Policisë kryekomisar Fatjon Sadikaj, me mbi 20 vite përvojë në Policinë e Burgjeve.

Ndryshime janë bërë edhe në IEVP Durrës, ku në postin e drejtorit është emëruar Serjan Mazrreku, me eksperiencë në administratë dhe në fushën ligjore.

Ndërkohë, detyrën e Shefit të Policisë në këtë institucion do ta mbajë kryekomisar Florian Masha, i cili ka një karrierë të gjatë në radhët e Policisë së Shtetit.

Këto lëvizje synojnë forcimin e sigurisë, rritjen e efikasitetit në administrimin e institucioneve penitenciare dhe përmirësimin e standardeve në trajtimin e të dënuarve.