Biznesmeni Behgjet Pacolli ka reaguar pas raportimeve se Ministria e Infrastrukturës dhe Energjisë ka nisur procedurat për zgjidhjen e kontratës së koncesionit për Aeroportin Ndërkombëtar të Vlorës, duke deklaruar se kompania MABCO Constructions SA nuk është njoftuar zyrtarisht nga autoritetet shqiptare.
Në një deklaratë publike, Pacolli e cilëson të papranueshme që një investitor strategjik të mësojë për një vendim të tillë përmes mediave dhe jo përmes komunikimit institucional.
Sipas tij, nëse raportimet rezultojnë të sakta, atëherë shteti shqiptar po zgjedh me vetëdije rrugën e arbitrazhit tregtar ndërkombëtar. Ai thekson se MABCO ka tentuar të shmangë një përplasje ligjore dhe të gjejë një zgjidhje institucionale, por pretendon se kjo është bërë e pamundur për shkak të neglizhencës, mungesës së reagimit dhe veprimeve që i konsideron të paligjshme nga disa përfaqësues të institucioneve.
Pacolli deklaron se kompania ka një ekspozim financiar prej mbi 320 milionë eurosh, pa përfshirë fitimin e munguar dhe kostot ligjore. Sipas tij, projekti ishte në fazat përfundimtare dhe pranë procesit të certifikimit të aeroportit.
Ai pretendon gjithashtu se, pas një vendimi të Gjykatës së Lartë, MABCO është penguar të rikthehet në kantier për të përfunduar punimet. Sipas Pacollit, për muaj me radhë kompania nuk është lejuar të ushtrojë aktivitetin në objekt, ndërsa një pjesë e pajisjeve është dëmtuar ose vjedhur.
Në reagimin e tij, Pacolli argumenton se është paradoksale që, sipas tij, institucionet fillimisht kanë penguar përfundimin e projektit dhe më pas e përdorin këtë situatë si argument për zgjidhjen e kontratës. Ai shton se një veprim i tillë bie ndesh me kontratën e koncesionit, vendimin e Gjykatës së Lartë dhe marrëveshjen dypalëshe për mbrojtjen e investimeve mes Shqipërisë dhe Zvicrës.
Në përfundim, Pacolli paralajmëron se, nëse procedura për zgjidhjen e kontratës konfirmohet, MABCO do të ndjekë të gjitha rrugët ligjore për mbrojtjen e interesave të saj, përfshirë arbitrazhin tregtar ndërkombëtar ndaj Republikës së Shqipërisë. Ai thekson se kjo, sipas tij, nuk përbën kërcënim, por është pasojë e veprimeve dhe mosveprimeve që kompania i konsideron të paligjshme nga ana e institucioneve shtetërore.
