Ish-ministri dhe ekonomisti Arben Malaj ka reaguar në rrjetet sociale lidhur me debatet mbi protestat e fundit dhe etiketimet që u janë bërë protestuesve.
Malaj i ka cilësuar si të pavërteta dhe përçmuese deklaratat që i paraqesin protestuesit si “islamikë” nga Maqedonia e Veriut apo si “kosovarë antishqiptarë”.
“Etiketimi i protestuesve si ‘islamikë’ nga Maqedonia e Veriut apo si ‘kosovarë antishqiptarë’ është tërësisht i pavërtetë. Është një përcaktim përçmues dhe negativizues i disa mijëra protestuesve paqësorë dhe atdhetarë nga Shqipëria dhe diaspora”, shkruan Malaj.
Sipas tij, protestuesit janë të frymëzuar edhe nga qëndrimet e Sekretarit amerikan të Shtetit, Marco Rubio, si dhe nga vlerësimet e përfshira në raportet vjetore të Departamentit amerikan të Shtetit dhe agjencive që luftojnë krimin dhe mafien.
“Edhe ata janë frymëzuar nga Sekretari i Shtetit amerikan Rubio, bile nga vlerësimet kërcënuese që theksohen në raportet vjetore të Departamentit të Shtetit dhe agjencive respektive të luftës kundër mafies, që ka kapur ekonominë, politikën dhe shtetin tonë”, shprehet ai.
Malaj veçon veçanërisht pjesëmarrjen e të rinjve në protesta, duke argumentuar se një pjesë e tyre përfaqëson një brez që kërkon ndryshim politik.
“Në ato protesta ka dhjetëra mijëra të rinj shqiptarë të Gjeneratës Z, të cilët frymëzojnë ndryshim politik”, shkruan ish-ministri.
Ai e cilëson si të rrezikshme tezën se protestat mund të jenë nxitur apo përdorur për të afruar “radikalë” nga Maqedonia e Veriut apo persona që etiketohen si “antishqiptarë kosovarë”.
“Këto janë tezat më të rrezikshme për kombin shqiptar. Kjo është tezë për ta penguar kombin shqiptar dhe për ta lënë atë viktimë të megalomanisë personale të disa udhëheqësve të tij”, deklaron Malaj.
Në reagimin e tij, ai paralajmëron gjithashtu për tendenca që, sipas tij, mund të acarojnë marrëdhëniet mes Shqipërisë dhe shqiptarëve në rajon.
“Ka tendenca të përsëritura për të provokuar dhe acaruar marrëdhëniet mes Shqipërisë dhe shqiptarëve në rajon. Po kështu, herë pas here hidhen teza provokuese në raportet Veri-Jug të vendit tonë”, shkruan ai.
Malaj argumenton se Shqipëria duhet të synojë integrimin e rajonit në Bashkimin Evropian dhe jo një projekt të bazuar vetëm në zgjerimin territorial apo demografik.
“Shqipëria është e përkushtuar për një ‘Evropë të Madhe’ ku të jenë të përfshira dhe të integruara të gjitha vendet e Ballkanit, dhe jo për një Shqipëri thjesht numerikisht të madhe”, shprehet ai.
Më tej, Malaj përdor një metaforë të fortë për të kritikuar keqqeverisjen dhe pasojat e saj.
“Çdo keqqeverisje që tenton të zmadhohet në përmasa është si madhësia e dinamitit. Sa më të thella dhe më të mëdha rrënjët e keqqeverisjes, aq më vrastare është shpërthimi i vatrës së keqqeverisjes për popujt e tyre”, shkruan Malaj.
Ai kundërshton gjithashtu idenë se fuqia e një shteti mund të matet vetëm përmes sipërfaqes apo numrit të banorëve, duke iu referuar teorive ekonomike.
Në fund të reagimit, Malaj i konsideron protestuesit paqësorë si një burim shprese dhe shpreh kritika ndaj disa prej atyre që më parë kanë kundërshtuar qeverinë, por që sipas tij tashmë janë kthyer në mbështetës të saj.
“Protestuesit paqësorë dhe atdhetarë dhe përkushtimi i tyre janë shpresa e shqiptarëve”, shkruan ai.
Malaj akuzon gjithashtu disa kritikë të mëparshëm të qeverisë se janë “vetëkonvertuar” në pro-qeveritarë dhe anti-protestues, duke pretenduar se një pjesë e tyre ndodhen në konflikt interesi për shkak të lidhjeve financiare me institucionet publike apo oligarkët.
“Shumë prej tyre ndodhen në konflikt interesi, pasi paguhen nga paratë publike ose oligarkët qeveritarë”, shkruan ai.
Në përfundim, ish-ministri e lidh këtë situatë me marrëdhëniet mes pushtetit, biznesit dhe medias, duke e cilësuar si një aleancë që, sipas tij, nuk është e pajtueshme me një demokraci funksionale.
“Kjo aleancë kriminalizuese midis oligarkisë, qeverisë dhe mediave është e pamundur në vende me demokraci funksionale”, përfundon Malaj.
