Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Partia Socialiste i ka kërkuar Kuvendit ngritjen e një Komisioni të Posaçëm Parlamentar për fazën e dytë të Reformës Administrativo-Territoriale, me fokus te funksionimi i bashkive, financat vendore dhe zhvillimi rajonal.
Sipas kërkesës së socialistëve, faza e re e reformës nuk do të kufizohet vetëm te ndarja territoriale, por do të përfshijë edhe rishikimin e mënyrës se si ushtrojnë funksionet pushteti vendor dhe si financohen shërbimet për qytetarët.
Komisioni do të shqyrtojë kuadrin ligjor që rregullon veprimtarinë e bashkive, me synimin për të forcuar decentralizimin dhe për të përmirësuar qëndrueshmërinë financiare të njësive të qeverisjes vendore.
Në kërkesën drejtuar Kuvendit, PS propozon që komisioni të ketë 16 anëtarë, të përzgjedhur sipas përfaqësimit të grupeve parlamentare. Kryetari do të jetë përfaqësues i shumicës parlamentare, ndërsa posti i zëvendëskryetarit do t’i takojë pakicës parlamentare.
Afati i parashikuar për punën e komisionit është nëntë muaj nga data e miratimit të vendimit, me mundësi zgjatjeje nga Kuvendi, nëse paraqitet një kërkesë e arsyetuar nga kryetari i tij.
Konsultime me bashkitë dhe përgatitje për zgjedhjet e vitit 2027
Sipas socialistëve, puna e komisionit do të zhvillohet përmes konsultimeve me bashkitë, institucionet shtetërore, shoqërinë civile dhe partnerët ndërkombëtarë. Një nga objektivat e deklaruara është edhe përafrimi i kuadrit ligjor me standardet e Bashkimit Europian.
Një tjetër detyrë e parashikuar është ndjekja e zbatimit të ndarjes së re territoriale dhe përgatitja e masave ligjore e administrative për funksionimin e bashkive të reja pas zgjedhjeve vendore të vitit 2027.
Nisma vjen në prag të zgjedhjeve të ardhshme vendore dhe hap një proces të ri diskutimi për organizimin e pushtetit vendor, kompetencat e bashkive dhe burimet financiare në dispozicion të tyre.
Ngritja e komisionit dhe mënyra se si do të zhvillohet puna e tij do të varen nga vendimmarrja e Kuvendit. Mbetet për t’u parë se cilat ndryshime konkrete do të propozohen dhe nëse ato do të prekin vetëm funksionet e financat vendore apo edhe organizimin territorial të bashkive.
