Vendimi i Deborah Beqajt, vajzës së ish-ministrit të Shëndetësisë, Ilir Beqaj, për të hequr dorë nga shtetësia shqiptare, ka rikthyer në vëmendje një debat që prek jo vetëm një rast konkret, por një fenomen më të gjerë në shoqërinë shqiptare, raportin mes elitës politike, qytetarëve dhe besimit te vendi.
Në vite, shumë figura politike kanë dalë publikisht duke promovuar një imazh pozitiv për Shqipërinë, duke deklaruar se vendi ka bërë hapa të mëdhenj përpara, se ekonomia është zhvilluar, se mundësitë janë shtuar dhe se të rinjtë kanë arsye për të ndërtuar të ardhmen brenda vendit.
Por paralelisht me këto deklarata, një pjesë e familjarëve të politikanëve dhe ish-zyrtarëve të lartë kanë zgjedhur një tjetër rrugë. Kanë zgjedhur jetën jashtë Shqipërisë, studimet në vende të huaja dhe në disa raste edhe marrjen e një shtetësie tjetër.
Rasti i fundit është ai i Deborah Beqajt, vajzës së ish-ministrit Ilir Beqaj, e cila ka hequr dorë nga shtetësia shqiptare me dekret të Presidentit të Republikës. Vendimi vjen në një kohë kur ish-ministri ndodhet nën masën e sigurisë “arrest në shtëpi”, duke e bërë këtë zhvillim edhe më të komentuar publikisht.
Pikërisht këtu lind edhe kontrasti që shpesh ngre pikëpyetje në opinionin publik. Ndërsa politikanë të ndryshëm flasin për një Shqipëri që po ecën përpara, që ofron mundësi dhe ku drejtësia funksionon, një pjesë e familjeve të tyre zgjedhin të sigurojnë një të ardhme jashtë vendit dhe me një pasaportë tjetër.
Sigurisht, zgjedhja e shtetësisë është një e drejtë personale dhe fëmijët nuk mund të mbajnë përgjegjësi për postet apo vendimet politike të prindërve të tyre.
Por, te familjet e politikanëve ky fenomen merr një tjetër peshë simbolike. Për qytetarët, pyetja që shtrohet është nëse edhe vetë njerëzit që drejtojnë vendin kanë të njëjtin besim te sistemi që u kërkojnë të tjerëve të besojnë.
Debati nuk është vetëm për një pasaportë, por për një perceptim më të gjerë. A besojnë realisht elitat politike te vendi që drejtojnë, apo zgjedhin për familjet e tyre atë që shumë qytetarë të zakonshëm e kërkojnë prej vitesh, një mundësi për një jetë më të sigurt jashtë Shqipërisë?
