Emri i biznesmenit Orest Sota u bë publik për herë të parë në vitin 2017, në kulmin e hetimeve që çuan në përfshirjen e ish-ministrit të Brendshëm, Saimir Tahiri, në dosjen e njohur “Habilaj”.
Më 1 nëntor 2017, Orest Sota u ndalua nga policia në Elbasan, pasi nuk iu bind urdhrit për të ndaluar automjetin. Gjatë kontrollit, autoritetet gjetën rreth 863 mijë euro cash, si dhe dy leje drejtimi për mjete lundruese në emër të ish-ministrit të Brendshëm Saimir Tahiri.
Zbulimi i dokumenteve të Tahirit në automjetin e Sotës shkaktoi një debat të fortë politik dhe u lidh menjëherë me hetimet ndaj ish-ministrit socialist, i cili në atë kohë po përballej me akuzat që rridhnin nga dosja e trafikut të drogës të grupit Habilaj.
Hetimet dhe procesi gjyqësor
Pas arrestimit, Sota u akuzua për mosbindje ndaj policisë, drejtim të parregullt të automjetit dhe fshehje të të ardhurave. Ai qëndroi për një periudhë në burg, ndërsa hetimet u përqendruan edhe te origjina e shumës së konsiderueshme të parave të gjetura në automjetin e tij.
Në vitin 2020, Gjykata e Elbasanit e shpalli fajtor vetëm për drejtim të parregullt të mjetit dhe mosbindje ndaj policisë, duke e dënuar me 240 orë punë në shërbim të komunitetit. Akuza për fshehje të të ardhurave ishte pushuar në seancën paraprake, ndërsa hetimet për pastrim parash vijuan pa autor të identifikuar.
Lidhja me dosjen “Saimir Tahiri”
Emri i Orest Sotës mbeti i lidhur me çështjen e Saimir Tahirit për shkak të patentave të gjetura në makinën e tij dhe dyshimeve të ngritura nga prokuroria mbi destinacionin e shumës së sekuestruar. Megjithatë, ai nuk u përfshi në procesin penal ndaj ish-ministrit dhe nuk pati akuza të drejtpërdrejta në dosjen “Tahiri”.
Rikthimi i përballë drejtësisë
Pas disa vitesh larg vëmendjes publike, emri i biznesmenit elbasanas është rikthyer sërish në skenë pas operacionit të fundit të SPAK kundër një grupi të dyshuar për trafik ndërkombëtar droge dhe pastrim parash.
Sipas informacioneve të publikuara, Orest Sota rezulton mes personave ndaj të cilëve janë marrë masa sigurie në kuadër të hetimeve që lidhen me grupin e vëllezërve Koçeku. Në të njëjtën dosje përmenden edhe emra të tjerë të njohur të botës së biznesit, ndërsa SPAK po heton dyshimet për investimin e të ardhurave kriminale në sektorin e ndërtimit dhe pasurive të paluajtshme.
Nga dosja “Habilaj” te dosja e SPAK
Për gati një dekadë, emri i Orest Sotës është shfaqur në disa nga çështjet më të bujshme të drejtësisë shqiptare. Fillimisht ai u bë i njohur për episodin e 863 mijë eurove dhe dokumenteve të Saimir Tahirit, ndërsa sot ndodhet sërish nën vëmendjen e Prokurorisë së Posaçme, në kuadër të një hetimi të ri që lidhet me trafikun e narkotikëve, pastrimin e parave dhe investimet e dyshuara në Shqipëri./ E Vërteta.al
5 vjet hetime, SPAK goditi biznesmenët e kullave/ 20 emrat e lidhur me ndërtimin dhe drogën
