Prokurori i Përgjithshëm në detyrë i SHBA-së, Todd Blanche, ka firmosur një urdhër formal që i jep fund fondit prej 1.8 miliardë dollarësh të propozuar nga Presidenti Donald Trump për të kompensuar persona që pretendojnë se janë ndjekur penalisht në mënyrë të padrejtë.
Vendimi vjen pas disa javësh negociatash me dy senatorë republikanë, John Cornyn dhe Thom Tillis, të cilët kishin bllokuar përkohësisht procesin e konfirmimit të Blanche si Prokuror i Përgjithshëm.
Një zëdhënëse e senatorit Cornyn konfirmoi marrëveshjen, e cila u arrit përpara votimit të parashikuar në Komitetin Gjyqësor të Senatit për emërimin e Blanche.
Fondi ishte kthyer në një çështje të debatueshme politike, pasi kritikët ngritën shqetësime se mund të përfitonin edhe persona të dënuar për sulmin ndaj policisë dhe trazirat në Kapitol më 6 janar 2021.
Blanche kishte deklaruar më herët në një seancë dëgjimore se Departamenti i Drejtësisë nuk do të vijonte me krijimin e fondit, por senatorët Cornyn dhe Tillis kërkuan një garanci zyrtare me shkrim përpara se të mbështesnin kandidaturën e tij.
Në deklaratën e tij, Blanche tha se vendimi ishte rezultat i diskutimeve me senatorët dhe anëtarët e komisionit.
“Unë dhe ekipi im jemi takuar me anëtarët e komisionit dhe senatorët gjatë javëve të fundit dhe kemi adresuar çdo shqetësim apo pyetje të pazgjidhur”, u shpreh Blanche.
Departamenti i Drejtësisë bëri të ditur se urdhri i ri shfuqizon zyrtarisht vendimin e mëparshëm të 18 majit 2026 për krijimin e fondit, duke konfirmuar se ai nuk do të zbatohet.
Çështja kishte ndikuar drejtpërdrejt në procesin e emërimit të Blanche, i cili ka shërbyer më herët si avokat personal i Trump dhe më pas si zëvendësprokuror i përgjithshëm, përpara se të merrte drejtimin e përkohshëm të Departamentit të Drejtësisë.
Edhe pse Blanche ka mohuar se po kërkonte postin e përhershëm, ai ka mbështetur në mënyrë aktive prioritetet e administratës Trump gjatë drejtimit të përkohshëm të institucionit.
Presidenti Trump kishte shprehur vazhdimisht mbështetje për fondin, duke argumentuar se personat e përfshirë në çështjet e 6 janarit kishin pësuar dëme të mëdha dhe meritonin kompensim. Megjithatë, pas marrëveshjes me senatorët republikanë, fondi është zyrtarisht mbyllur.
