Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Ilir Proda e kaloi vetingun e Policisë së Shtetit më 8 mars 2024. Vendimi i Agjencisë së Mbikëqyrjes Policore mban firmat e trupës së vlerësimit të përbërë nga Bora Vrenjo, Henri Nagellari dhe Loreta Haxhari. Pak më shumë se dy vite më vonë, ish-drejtori i Përgjithshëm i Policisë së Shtetit është në qendër të një tjetër procedure të SPAK, këtë herë pas kontrollit të banesës së tij të autorizuar nga GJKKO.
Pikërisht ky zhvillim rikthen në vëmendje mënyrën se si u kalua filtri i vetingut dhe çfarë informacioni kishte në dispozicion trupa që mori vendimin për Prodën.
Çfarë thotë vendimi i vetingut?
Në vendimin nr. 21, datë 8 mars 2024, AMP e ka vlerësuar Prodën në kuadër të vlerësimit kalimtar, në atë kohë me detyrë drejtor i Drejtorisë Vendore të Policisë Elbasan. Trupa e Vlerësimit ka shqyrtuar tre komponentët e procesit, pasurinë, figurën dhe profesionalizmin.
Në pjesën që lidhet me figurën, dokumenti zyrtar përmban një të dhënë që sot merr rëndësi të veçantë.
Institucioni përgjegjës për verifikimin e sigurisë i kishte bërë me dije trupës së vetingut se Ilir Proda nuk ishte pajisur me Certifikatë Sigurie Personeli (CSP) të vlefshme.
Megjithatë, në të njëjtën përgjigje thuhej se ndaj tij nuk ishte marrë vendim për refuzimin, heqjen apo pezullimin e certifikatës dhe se procesi i verifikimit të sigurisë vijonte.
Madje, dokumenti i vetingut tregon se gjatë procesit të verifikimit për pajisjen me certifikatë sigurie ishin administruar edhe të dhëna referuese në ngarkim të Prodës. Sipas informacionit të përcjellë te trupa e vlerësimit, pas verifikimeve përkatëse, vërtetësia e këtyre të dhënave nuk ishte konfirmuar.
Në dhjetor 2023, institucioni përgjegjës informonte sërish se Proda nuk kishte ende CSP të vlefshme, pasi procesi ishte në vijim. Pavarësisht kësaj, disa muaj më pas trupa e AMP-së vendosi se ai e kishte kaluar vlerësimin kalimtar.
Edhe në vlerësimin profesional ka një tjetër detaj
Sipas të dhënave të pasqyruara në vendimin e vetingut, për periudhën e marrë në shqyrtim Proda kishte tre vlerësime profesionale të evidentuara. 27 pikë për vitin 2018, 28 pikë për vitin 2021 dhe 100 pikë për vitin 2022.
Pra, dokumenti zyrtar tregon një ndryshim të fortë mes vlerësimeve të viteve të ndryshme. Megjithatë, trupa e vlerësimit nuk e konsideroi këtë të mjaftueshme për një rezultat negativ në komponentin profesional.
Në fund, vendimi i 8 marsit 2024 e la Prodën të vijojë karrierën në Policinë e Shtetit. Vetëm disa muaj më vonë, në tetor 2024, ai u emërua Drejtor i Përgjithshëm i Policisë së Shtetit. Në momentin e emërimit, ministri i Brendshëm Ervin Hoxha deklaroi se kandidaturat ishin verifikuar nga organet ligjzbatuese dhe se Proda i kishte kaluar etapat e verifikimit.
Telefoni i sekuestruar nga SPAK
Në atë kohë, emri i Prodës ishte përmendur edhe në një tjetër kontekst.
Në shtator 2024, mediat raportuan se SPAK kishte marrë telefonin e tij për verifikim në kuadër të hetimeve që lidhen me dyshimet për dekonspirimin e një operacioni ndaj grupit Çopja në Elbasan. Vetë ministri Hoxha, kur u pyet për këtë çështje gjatë emërimit të Prodës, deklaroi se të gjitha organet ligjzbatuese ishin pyetur dhe se kandidatura ishte verifikuar.
Pra, në kohën kur Proda u emërua në krye të Policisë së Shtetit, ekzistonte tashmë një episod i verifikimit nga SPAK lidhur me telefonin e tij. Kjo nuk do të thotë se ai ishte i pandehur apo i dënuar, por është një fakt që tashmë bën pjesë në historikun publik të tij.
Dy vite më pas, SPAK i kontrollon banesën
Më 22 shtator 2026, situata mori një tjetër zhvillim.
SPAK njoftoi zyrtarisht se, në kuadër të procedimit penal nr. 20/1 të vitit 2025, GJKKO kishte lejuar me vendimin nr. 618, datë 20 shtator 2026, kontrollin e banesës dhe kontrollin personal të shtetasit I.P., ish-funksionar i lartë i Policisë së Shtetit.
Në të njëjtin aksion, me vendimin nr. 619, datë 21 shtator 2026, gjykata kishte autorizuar kontrollin e një kompleksi vilash në zonën e Shkozetit në Durrës.
SPAK bëri të ditur gjithashtu se në të njëjtin procedim gjykata kishte caktuar masa sigurimi ndaj disa personave të tjerë, përfshirë arrest në shtëpi për ish-drejtoren e SHISH, V.H., dhe arrest në burg për dy persona të tjerë.
Proda u paraqit më pas në SPAK dhe u mor në pyetje. Raportimet mediatike e lidhën aksionin me hetimin më të gjerë që ka prekur edhe biznesmenët Ergys Agasi dhe Ermal Beqiraj dhe zyrtarë të tjerë.
A i duhet besuar Vetingut?
Këtu qëndron edhe pikëpyetja kryesore që rikthen në vëmendje dosjen e vetingut.
Në vitin 2024, trupa e AMP-së arriti në përfundimin se Ilir Proda e kishte kaluar vlerësimin kalimtar. Dokumenti zyrtar pasqyronte ndërkohë se ai nuk kishte një Certifikatë Sigurie Personeli të vlefshme dhe se procesi i verifikimit të sigurisë ishte ende në zhvillim.
Më pas ai u emërua në krye të Policisë së Shtetit.
Sot, pas kontrollit të banesës së tij të autorizuar nga GJKKO dhe paraqitjes në SPAK, mënyra se si u administruan dhe u vlerësuan informacionet gjatë procesit të vetingut merr një rëndësi të re publike.
Rasti ngre një çështje konkrete për vetë mekanizmin e vetingut në Policinë e Shtetit. Sa efektiv është filtri i integritetit kur një zyrtar që ka kaluar vlerësimin përfundon më pas në procedura të kontrolluara nga drejtësia?
