Gjykata e Posaçme kundër Korrupsionit dhe Krimit të Organizuar (GJKKO) ka pranuar kërkesën e ish-kryeministrit Sali Berisha për të thirrur si dëshmitar kryeministrin Edi Rama, në cilësinë e tij si ish-kryetar i Bashkisë së Tiranës.

Po ashtu, gjykata ka vendosur të marrë në shqyrtim të gjitha provat shkresore të paraqitura nga SPAK, si dhe provat e kërkuara nga mbrojtja e të pandehurve në proces.

Çështja e njohur si “Partizani” ka kaluar për gjykim më 19 maj dhe përfshin disa persona të akuzuar për korrupsion dhe pastrim parash.

Sipas akuzave të SPAK, Berisha po gjykohet për korrupsion pasiv të zyrtarëve të lartë, në lidhje me veprime të dyshuara gjatë periudhës së ushtrimit të detyrës si kryeministër, ku përfitues dyshohet të ketë qenë edhe dhëndri i tij.

Në të njëjtën dosje, Jamarbër Malltezi akuzohet për korrupsion dhe pastrim parash, me dyshime se ka përfituar rreth 5.4 milionë euro nga një aktivitet ndërtimi në mënyrë të parregullt, përmes vendimeve të qeverisë.

Ndërkohë, Fatmir Bektashi akuzohet për korrupsion dhe pastrim parash, ndërsa Xhimi Begeja dhe Andia Pustina, së bashku me disa kompani të lidhura me çështjen, përfshirë “Homeplan”, “Kontakt” dhe “Studio Pustina”, akuzohen për pastrim parash.

Procesi gjyqësor vijon në GJKKO, ku pritet shqyrtimi i mëtejshëm i provave dhe dëshmive të palëve.