Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Përplasja mes Gjykatës së Posaçme kundër Korrupsionit dhe Krimit të Organizuar (GJKKO) dhe avokatëve është përshkallëzuar, pas hyrjes në fuqi të rregullores së re që ndalon mbajtjen dhe përdorimin e telefonave celularë në sallat e gjyqit.
Dhoma Kombëtare e Avokatisë vendosi më 8 shtator bojkotin pa afat të seancave gjyqësore në GJKKO, duke kërkuar pezullimin e rregullores. Avokatët kundërshtojnë kufizimin e përdorimit të telefonave, të cilët i konsiderojnë mjete të rëndësishme për ushtrimin e profesionit dhe komunikimin gjatë proceseve gjyqësore.
Kryetari i Dhomës Kombëtare të Avokatisë, Maksim Haxhia, ka argumentuar se rregullorja cenon ushtrimin e së drejtës së mbrojtjes dhe ka kërkuar që gjykata të rishikojë vendimin. Avokatët kanë paralajmëruar se kundërshtimi mund të ndiqet edhe në rrugë ligjore.
GJKKO nuk tërhiqet, avokatët gjobiten
Përplasja mori një tjetër zhvillim më 21 shtator, kur trupa gjykuese e GJKKO-së vendosi gjoba prej 50 mijë lekësh për secilin ndaj më shumë se 10 avokatëve që nuk morën pjesë në proces si mbrojtës, por qëndruan në pjesën e sallës të rezervuar për publikun, në kuadër të bojkotit.
Gjobat u vendosën gjatë seancës për çështjen e vrasjeve të Vajdin Lamajt dhe Klodian Saliut, ku të pandehur janë edhe Lulzim Berisha dhe Emiljano Shullazi.
Nga ana e saj, GJKKO ka mbrojtur rregulloren, duke argumentuar se ndalimi i telefonave është masë për ruajtjen e rendit dhe sigurisë dhe zbatohet për të gjithë pjesëmarrësit në proces. Gjykata sqaron se avokatët mund të përdorin laptopët për të konsultuar dosjen elektronike, aktet dhe provat, ndërsa komunikimi konfidencial me klientët garantohet në ambiente të posaçme.
Në përgjigjen drejtuar Dhomës së Avokatisë, gjykata ka kërkuar zbatimin e rregullores, duke theksuar se kundërshtimet mund të ndiqen përmes rrugëve ligjore.
Në konflikt edhe gazetarët
Rregullorja e re ka sjellë kundërshtime edhe nga organizatat e gazetarëve, për shkak të kufizimeve për përdorimin e telefonave në sallë, regjistrimin e pamjeve dhe ndjekjen e seancave. Për të marrë pjesë në një seancë, gazetarët duhet të paraqesin kërkesë me shkrim të paktën 24 orë përpara, ndërsa numri i tyre në sallë mund të kufizohet.
Kritikët e rregullores paralajmërojnë se kufizimet mund të pengojnë raportimin në kohë reale dhe transparencën e proceseve gjyqësore. Nga ana tjetër, GJKKO këmbëngul se rregullat synojnë të garantojnë rendin dhe sigurinë në ambientet e gjykatës.
Përplasja tashmë nuk kufizohet vetëm te përdorimi i telefonave, por ka kaluar në bojkot seancash, masa financiare ndaj avokatëve dhe kërkesa për rishikimin e një rregulloreje që prek drejtpërdrejt punën e mbrojtjes dhe të medias.
